Jarqyn jeńis. El bolyp maqtanar mereıli mezet, ult bolyp ulyqtalar tarıhı sát. Marapattaý saltanatyna Samaldyń oıý-órnekti ulttyq kıimmen shyqqan sátiniń ózi muqym qazaqtyń alty qurlyqqa mártebeli atyn shyǵaryp, qazaq rýhanııatynyń kókjıegin keńge jaıdy.
Týyndy sheteldiki bolǵanmen, týma talant qazaq topyraǵynyń túlegi. Ortaq oljaǵa orys halqynan artyq qýanbasaq, kem qýanbaıtynymyz anyq. «Sergeı, saǵan kóp raqmet. Bul zor qurmet», dedi Samal júlde tuǵyrynda turyp.
«Aıka» áleýmettik dramasy Qyrǵyzstannan kelgen qyz jaıynda órbigen. Keıipker Máskeýde bosanyp, balasyn perzenthanaǵa tastaýǵa májbúr bolady, kartınada sol qyzdyń analyq sezimi men qaıǵy-muńy sýretteledi. Fılm bes kompanııanyń qoldaýymen túsirilgen, atap aıtar bolsaq «Kınodvor» atty Sergeı Dvorsevoıdyń stýdııasy, sonymen qatar Germanııanyń, Polshanyń, Qytaıdyń, Qazaqstannyń kompanııalary. Buǵan deıin ol «Tıýlpan» fılminde basty róldi somdaǵan. Ol týyndy 2008 jyly Kannda «Erekshe kózqaras» konkýrsynyń bas júldesin, jas ádilqazylardyń júldesin, sonymen qatar Fransııanyń bilim mınıstrliginiń júldesin jeńip alǵan bolatyn. Qazaqstandyq aktrısa Samal Eslıamova atalǵan kartınada jumys istegen ýaqytta óziniń eshqandaı nagradalar týraly oılamaǵandyǵyn aıtady. «Sizdi sýretke túsirgende, rejısser ony qalaı josparlaǵanyn bilý óte mańyzdy. Bul tájirıbe bizdiń basty maqsatymyz, ol shyǵarmashylyq ujymnyń alǵa basýyna kóp kómektesti», deıdi qaragóz qaryndasymyz.
Aktrısanyń qysqasha ómirbaıanyna keler bolsaq, jeńimpaz jerlesimiz 1984 jyly 1 qyrkúıekte dúnıege kelgen. 2011 jyly Reseıdiń teatr óneri ınstıtýtyn (GITIS) bitirgen. Aktrısanyń anasy Gúlmaıra men ákesi Ilııas Soltústik Qazaqstan oblysynyń Aqqaıyń aýdanyndaǵy Aralaǵash aýylynda týǵan.
Aktrısanyń ápkesi Aıagóz Satına bolsa, Samaldyń 2004 jyldan beri Máskeýde turyp jatqanyn aıtady. «Samal ata-anasyna jıi kelip turady. Endi aty álemge áıgili aktrısany onyń ákesi men sheshesi jaz aıynda keledi dep kútip otyr», deıdi ol.
Kann kınofestıvali 8-19 mamyr aralyǵynda ótti. Negizgi festıval 21 fılm arasynda ótkizildi. Atalǵan júlde tuǵyryna jerlesimizdiń kóterilýi bolashaq jastardy yntalandyryp, otandyq kınonyń qaryshtap damýyna yqpal eteri anyq.
Aıta keteıik, negizgi bas júldeni qazylar alqasy «Dúken urlyqshysy» fılmin túsirgen japon rejısseri Hırokadze Koreedaǵa berdi. Kann festıvaliniń qazylar alqasy Samal Eslıamovamen birge ıtalııalyq Marchello Fontqa «Dogman» kartınasy úshin eń úzdik er adam rólin berdi. Rok-mýzykant Vıktor Soı taǵdyryna arnalǵan Kırıll Serebrennıkovtyń «Jaz» fılmi eń úzdik saýndtrek júldesine qol jetkizdi.
Mıras ASAN,
«Egemen Qazaqstan»
